Microsoft компани саяхан Windows үйлдлийн системийн шинэ хувилбар болох Windows 11-ийг танилцууллаа. Энэхүү шинэчлэл нь илүү бүтээмжийг нэмэгдүүлэх, шинэлэг бөгөөд орчин үеийн загвартай, хэрэглэгчдэд дэлгэцээ өөрийн хүссэнээр удирдах боломжийг олгосон хэлбэрээр энэ оны сүүлээр нээлтээ хийхээр төлөвлөж байна.

Үнэгүй шинэчлэлт:

Windows 11 нь Windows 10 үйлдлийн системтэй хэрэглэгчдэд үнэ төлбөргүй шинэчлэлт хийх боломжийг олгоно. Гэхдээ таны компьютер дараах хоёр шаардлагыг хангасан байх ёстой:

1. Таны компьютер Windows 10-ийг лицензтэй ашигладаг байх.

2. Таны компьютер Windows 11-ийн техникийн шаардлагыг хангасан байх.

Хэрэв таны төхөөрөмж Intel-ийн 8-р үеийн процессоргүй бол Windows 11 ажиллахгүй. Тодруулбал, таны компьютер 2019 он болон түүнээс өмнө үйлдвэрлэгдсэн бол шинэ хувилбарыг ачааллах боломжгүй байх магадлал өндөр. Өөрийн компьютерийн нийцлийг шалгахын тулд эсвэл PC Health Checker-ийг ашиглаж болно.

Дизайны шинэчлэл:

Windows 11 нь өмнөх хувилбаруудаасаа илүү шинэлэг, орчин үеийн, минималистик загвартай болсон. “Start” цэсийг дэлгэцийн төв хэсэгт байрлуулж, хамгийн түгээмэл хэрэглэгддэг програмуудыг төвлөрүүлсэн. Мөн “Settings” цэсийг хялбаршуулж, хэрэглэгчдэд шаардлагатай тохиргоог хурдан олох боломжийг нэмэгдүүлсэн.

Бүтээмжийг нэмэгдүүлэх боломжууд:

Шинэ дэлгэц хуваах сонголтууд нь олон програм дээр зэрэг ажилладаг хүмүүст тохиромжтой. “Widgets” цэсний тусламжтайгаар цаг агаар, мэдээ зэрэг мэдээллийг хялбархан хүлээн авах боломжтой. Мөн Microsoft Teams-ийг системд шууд нэгтгэснээр харилцааны нэмэлт сонголтуудыг санал болгож байна.

Аппликейшнүүдийн өргөжилт:

Windows Store нь Android аппликейшнүүдийг дэмжих болсноор хэрэглэгчдийн сонголт нэмэгдэж, хөгжүүлэгчдэд шинэ боломжуудыг нээж байна. Мөн Microsoft хөгжүүлэгчдээс авах шимтгэлийг бууруулж, өөрсдийн төлбөрийн системийг чөлөөтэй ашиглахыг зөвшөөрсөн нь онцлох өөрчлөлт юм.

Windows 11 нь 2021 оны сүүлээр албан ёсоор хэрэглээнд нэвтрэх төлөвтэй байна.